ល្ហិចល្ហៀងកីឡាករកូនកាត់ខ្មែរ-អាមេរិក Nick Taylor បដិសេធសំណើក្លិបមួយក្នុង Thai League 1

លឺដំណឹងថាក្រុមលីគកំពូលថៃ Chiangrai United ចាប់អារម្មណ៍ក្នុងការនាំយកកីឡាករ Nick Taylor ចូលរួមនៅរដូវកាលក្រោយ តែត្រូវបានរូបគេបដិសេធ និងរួមរស់ជាមួយព្រះខ័នរាជស្វាយរៀងបន្តទៀត។

Nick Taylor លេងឱ្យក្លិបព្រះខ័នរាជស្វាយរៀងនាពេលកន្លងមក

ព័ត៌មាន​នេះបាន​លេច​លឺ​ក្នុងបណ្ដាញសង្គមបាល់ទាត់កម្ពុជា​ក្នុងថ្ងៃនេះ តែ​មិន​ដឹង​ថា វា​ជាព័ត៌មានឬអត់នោះទេ។ បើ​ជាការ​ពិត វាក៏មាន​ផលល្អ និង​ផល​អាក្រក់ទន្ទឹម​គ្នា​សម្រាប់​ការ​ផ្ទេរទៅ​លេង​ក្នុង​លីគកំពូល​ថៃ។

ចូលរួមជាមួយក្លិប​មាន​មូលដ្ឋាន​នៅ​ខេត្តស្វាយរៀងក្នុងឆ្នាំ២០២៣ Nick Taylor ជួយក្លិបមួយនេះ ​លើក​ពាន​២​ក្នុង​មួយរដូវកាល​ពោលគឺពាន​រង្វាន់ Cambodian Premier League និងពានរង្វាន់សម្ដេច ហ៊ុន សែន រដូវកាល ២០២៣/២៤ ។

Nick Taylor ជាមួយពាន​រង្វាន់ Hun Sen Cup 2023/24

លើសពីនេះ! រដូវ​កាល​ក្រោយ ព្រះខ័នរាជស្វាយរៀង​នឹង​មាន​វត្តមានក្នុងពានរង្វាន់ អន្តរជាតិចំនួន២ គឺពានរង្វាន់ AFC Challenge Cup វគ្គជម្រុះ Playoff និងពានរង្វាន់ AFF Shopee Cup 2024/25។ វាជាឱកាស​របស់ Nick ក្នុងការ​បង្ហាញខ្លួន​ក្នុងការ​ប្រកួតពាន​រង្វាន់លំដាប់ទ្វីអាស៊ី (AFC) និងពាន​រង្វាន់លំដាប់តំបន់ (AFF)។

ដោយ​ឡែក! ក្រុម Chiangrai United ស្ថិតក្នុងចំណាត់​ថ្នាក់លេខ៧ក្នុងតារាង Thai League 1 រដូវ​កាល​២០២៣​/២៤ ហើយពិតណាស់! ស្ថិតក្នុងចំណាត់​ថ្នាក់​នេះ​ពិត​ជាមិនមានកៅអី​លេង​ពានអន្តរជាតិនោះទេ។ រឿងដែល​ល្អសម្រាប់ Nick ដែល​ផ្ទេរទៅទីនោះគឺ លេង​ក្នុង​លីគដែលមានកម្រិតខ្ពស់ជាង Cambodian Premier League និង​ទទួលបាន​បទពិសោធន៍ថ្មីតែប៉ុណ្ណោះ៕