ក្លិបនៅ Premier League ភ្ញាក់ផ្អើលចំពោះការព្យួរកីឡាករ Rodrigo Bentancur មិនលេង​បាល់​៧​ប្រកួត

យោងតាមកាសែត The Telegraph ក្លិបគូប្រជែងមួយចំនួនរបស់ក្លិប Tottenham ក្នុងក្របខ័ណ្ឌ Premier League បាន​បង្ហាញភាព'ភ្ញាក់ផ្អើល' នៃភាពធ្ងន់ធ្ងរនៃការដាក់ទណ្ឌកម្មមក​លើ Rodrigo Bentancur ជុំវិញការលើកឡើងពីការរើសអើងជាតិសាសន៍ដែលគាត់បាន​និយាយអំពី Son Heung-min ។

Rodrigo Bentancur និង Son Heung-min ជួបគ្នាពេល​នៅ​ជម្រើសជាតិ​រៀងៗខ្លួន

ខ្សែបម្រើរបស់ Tottenham ត្រូវបានពិន័យមិនឱ្យលេងចំនួន 7 ប្រកួត និងផាកពិន័យ 100,000 ផោនសម្រាប់ការនិយាយថា Son មើលទៅដូចៗគ្នាទៅនឹងកីឡាករកូរ៉េខាងត្បូងផ្សេងទៀតទាំងអស់។ ពាក្យនេះ​ស្ដាប់ទៅហាក់មិនធ្ងន់ធ្ងរអ្វីនោះទេ ប៉ុន្តែសមាគមកីឡាបាល់ទាត់​អង់គ្លេស​ចាត់​ទុក​ថា​រឿង​នេះ​មិន​ធម្មតា។

Bentancur ត្រូវបានគេរកឃើញថាមាន "វិប្បដិសារីយ៉ាងពិតប្រាកដ" ចំពោះការលើកឡើងរបស់គាត់ ខណៈដែល Son បានអភ័យទោសជាសាធារណៈរួចទៅហើយ។

Rodrigo Bentancur និង Son Heung-min ពេល​ហ្វឹកហាត់​នៅ Tottenham

Son ក៏​បាន​និយាយអំពីពាក្យប្រមាថជាតិសាសន៍របស់ Bentancur: ៖«ខ្ញុំស្រឡាញ់គាត់ គាត់មានអារម្មណ៍សោកស្តាយណាស់»។

ទោះបីជាយ៉ាងណាក៏ដោយ FA បានចេញបម្រាមដែលធ្ងន់ធ្ងរជាងករណីរើសអើងជាតិសាសន៍មុនៗទៅទៀត។